Karlar ogkonur sem viðmælendur fjölmiðla
lutur kvenna sem viðmælendur fjölmiðla hefur lítið breyst frá því að málið var skoðað fyrir 15 árum, samkvæmt nýrri úttekt sem kynnt var á jafnréttisþingi í dag og yfir tímabilið 1. september 2014–31. ágúst 2015. Karlar voru um 70% viðmælenda í fréttum RÚV, Stöðvar 2 og Bylgjunnar á móti um 30% kvenna.
Fyrirtækið Creditinfo vann úttektina fyrir velferðarráðuneytið og tók hún til greiningar á viðmælendum í fréttum og völdum umræðuþáttum Ríkisútvarpsins (RÚV) og fjölmiðlafyrirtækisins 365 .
Rósa Guðrún Erlingsdóttir, sérfræðingur í velferðarráðuneytinu, kynnti niðurstöður greiningarinnar og benti þar meðal annars á að ástandið hefði lítið breyst frá árinu 2000 þegar sambærileg könnun var gerð. Konum sem viðmælendum fjölmiðla hefði afar lítið fjölgað. Greiningu á niðurstöðum má sjá í meðfylgjandi glærum úr kynningu Rósu Guðrúnar.
Í skýrslu velferðarráðherra um stöðu og þróun jafnréttismála árin 2013–2015 sem kynnt var í dag er fjallað um birtingarmyndir kynjanna í fjölmiðlum, hve mikilvægt sé að þeir sjálfir skoði hvaða myndir þeir dragi upp af konum og að þeir auki fjölbreytni til að endurspegla á réttari máta samfélagið og heilbrigðar fyrirmyndir fyrir bæði ungar konur og karla. Þar segir meðal annars að miðað við þá mynd af konum sem dregin er upp í fjölmiðlum og sterkra langtímaáhrifa þeirra séu miklar líkur á að staðalmyndir af kynjunum verið festar í sessi í fjölmiðlum: „Það er því ekki einungis staðreynd að það heyrist í færri konum en körlum heldur sjást þær sjaldnar og birtingarmynd þeirra er ólík karlanna“ segir meðal annars í skýrslunni.
Umfjöllun fyrrnefndar skýrslu sem snýr að fjölmiðlum lýtur einnig að fjölmiðlaumhverfinu sjálfu, hvort karlar séu þar ráðandi og karllæg viðhorf ríkjandi: „Munur er á efnistökum milli kynjanna, mikill munur er á fjölda viðmælenda eftir kyni eins og þegar hefur komið fram og munur er á blaða- og fréttamönnum eftir kyni.“ Vísað er í grein grein fjölmiðlafræðingsins Guðbjargar Hildar Kolbeins; Siðferði og starfshættir íslenskra blaða- og fréttamanna sem kynnt var í Þjóðarspegli árið 2012 þar sem fram kom fram að sjö af hverjum tíu blaða- og fréttamönnum væru karlar og að hinn dæmigerði íslenski blaða- eða fréttamaður væri 42 ára gamall karlmaður með tæplega 14 ára starfsreynslu. Blaða- eða fréttakonan væri hins vegar að meðaltali sjö árum yngri og hún hefði einnig styttri starfsreynslu eða rúm átta ár að meðaltali.
- Greining á viðmælendum RÚV og 365 miðla (glærukynning)
- Skýrsla ráðherra um stöðu og þróun jafnréttismála (umfjöllun um fjölmiðla bls. 84-90)