Úr samþykktum og ályktunum stjórnmálaflokka

20. gr.
Þátttaka í nefndum og ráðum á vegum hins opinbera.
Í nefndum, ráðum og stjórnum á vegum ríkis og sveitarfélaga skulu, þar sem því verður við komið, sitja sem næst jafnmargar konur og karlar. Skal ávallt á það minnt þegar óskað er tilnefningar í hlutaðeigandi nefndir, ráð og stjórnir.

Landsfundur jafnréttisnefnda á Hvolsvelli 19.–20. október 2001
Fundurinn skorar á öll stjórnmálaöfl að tryggja jafnan hlut kvenna og karla á framboðslistum í komandi kosningum. Sérstaklega er hvatt til þess að í tveimur efstu sætum hvers framboðslista sé fólk af báðum kynjum.

Landsfundur Samfylkingarinnar 16.–18. nóvember 2001

Lýðræðiskrafan snýr einnig inn á við og landsfundurinn hvetur til þess að við val á lista í komandi sveitarstjórnarkosningum verði jafnræðis kynja og aldurshópa gætt sem kostur er. Þá er þeirri eindregnu áskorun beint til kjördæmisráða að við skipan á framboðslista við alþingiskosningar 2003 verði sá háttur hafður á að veljist kona í fyrsta sæti, þá sé karl í því næsta o.s.frv. Veljist karl í fyrsta verði kona í öðru sæti o.s.frv. Við eigum það skilið að það verði jafnt milli kvenna og karla á Alþingi og Samfylkingin á að leggja sinn skerf til þess… Markmið okkar er samfélag þar sem konur og karlar taka jafnan þátt í atvinnulífi, fjölskyldulífi og mótun samfélagsins.

Úr jafnréttisáætlun Frjálslynda flokksins
Landsþing Frjálslynda flokksins haldið í Reykjavík 21. janúar 2001 lýsir þeim vilja sínum að jafna stöðu karla og kvenna á vettvangi stjórnmálanna með sérstökum aðgerðum. Í því skyni þarf að auka hlut kvenna. Áætlunin kveður á um það hvernig Frjálslyndi flokkurinn getur unnið að jafnrétti kvenna og karla í stjórnmálum.
Við röðun á framboðslista skal reynt að tryggja að hlutur kynjanna verði sem jafnastur í fulltrúatölu á Alþingi og í sveitarstjórnum.

10. þing landssambands framsóknarkvenna Skagafirði 31. ágúst–2. september 2001
Landsþing LFK skorar á framsóknarkonur að gefa kost á sér á framboðslista fyrir komandi kosningar, sem og í nefndir og ráð sveitarfélaganna að afstöðnum kosningum. Þannig hafa þær áhrif á sitt nánasta umhverfi og áframhaldandi mótun þjóðfélagsins.
Enn fremur vill LFK ítreka og leggja áherslu á það ákvæði í jafnréttisáætlun Framsóknarflokksins sem segir að við röðun á framboðslista flokksins skuli þeim aðferðum beitt sem tryggja það að hlutur kynjanna verði sem jafnastur í fulltrúatölu í sveitarstjórnum. Í næstu sveitarstjórnarkosningum og alþingiskosningum skulu konur skipa annað af tveimur efstu sætum á lista. LFK leggur áherslu á að störf sveitarstjórnarmanna séu metin til launa í samræmi við ábyrgð og umfang starfsins.

Í jafnréttisályktun 34. landsfundar Sjálfstæðisflokksins segir m.a.
Sjálfstæðisflokkurinn vill samfélag þar sem karlar og konur eru metin af verkum sínum og telur hvers konar kerfislæga mismunun á grundvelli kynferðis eða menningar stríða gegn hugsjónum sjálfstæðisstefnunnar..
Í öllu starfi Sjálfstæðisflokksins er lögð áhersla á virka þátttöku bæði karla og kvenna og hefur hlutdeild kynjanna á framboðslistum flokksins í sveitarstjórnar- og alþingiskosningum jafnast til mikilla muna á undanförnum árum. Konum í sveitarstjórnum fyrir flokkinn hefur fjölgað og margar eru þar í forystu. 43% þeirra, sem áttu sæti í þremur efstu sætum á listum flokksins fyrir síðustu sveitarstjórnarkosningar, voru konur. Niðurstaða fyrsta prófkjörs Sjálfstæðisflokksins fyrir næstu sveitarstjórnarkosningar, þ.e. á Seltjarnarnesi, lofar góðu, en þar var hlutdeild kvenna mikil.

Í bæklingi um kvenfrelsi sem hugmyndasmiðja VG lagði fram og kynnti á landsfundinum í Reykjavík 19.–21. október sl. er m.a. að finna eftirfarandi kafla um konur og völd
Í heiminum öllum sitja karlar á helstu valdastólum, hvort heldur litið er til einstakra þjóðríkja eða alþjóðastofnana sem hafa mikil áhrif á þróun heimsmálanna. Það sama á við um okkar samfélag. Konur hafa þó verið að sækja á og hafa æ fleiri náð að hasla sér völl þar sem ráðum er ráðið en sem hópur eru þær enn valda- og áhrifalitlar. Hugmyndasmiðja VG leggur áherslu á að þessu þurfi að breyta, lýðræðið þrífst ekki án þátttöku og sjónarmiða beggja kynja.
Þegar staða íslenskra kvenna er metin út frá alþjóðlegu sjónarhorni má segja að nokkuð hafi miðað í þá átt að jafna valdahlutföll kynjanna. Bæði hefur fjöldi kvenna á Alþingi vaxið umtalsvert á seinni árum og sömuleiðis hefur fjöldi þeirra í sveitarstjórnum farið vaxandi. Þá hefur fjöldi kvenna í ríkisstjórn aldrei verið meiri. Allt eru þetta mikilvægar mælistikur sem duga þó skammt ef konur nýta ekki fengin völd og áhrif til að rétta hlut kvenna. Hugmyndasmiðja VG telur baráttuna fyrir þátttöku kvenna í stjórnmálum og í öðru opinberu starfi mikilvæga en bendir á að áherslan megi ekki einskorðast við hana því þegar litið er til annarra mikilvægra sviða í samfélaginu er langt í land hvað varðar jöfnuð.