Kristján Þór Júlíusson heilbrigðisráðherra í velferðarráðuneyti

Kristján Þór Júlíusson, 2. þingmaður Norðausturkjördæmis, kom til starfa í velferðarráðuneytinu í dag þar sem hann gegnir embætti heilbrigðisráðherra í ríkisstjórn Sigmundar Davíðs Gunnlaugssonar sem tók formlega til starfa á ríkisráðsfundi á Bessastöðum í gær. 

Kristján Þór tók við lyklum að ráðuneytinu úr hendi Guðbjarts Hannessonar fyrrverandi velferðarráðherra skömmu fyrir hádegi í dag. Kristján Þór er annar tveggja ráðherra velferðarráðuneytisins. Helstu verkefni heilbrigðisráðherra snúa að heilbrigðisþjónustu, lyfjamálum, sjúkratryggingum, lýðheilsu og forvörnum. Félags- og húsnæðismálaráðherra fer meðal annars með fjölskyldumál, lífeyristryggingar, húsnæðismál, vinnumál og jafnréttismál.

Kristján Þór segir að eins og fram komi í samstarfsyfirlýsingu ríkisstjórnarinnar verði íslenskt heilbrigðiskerfi að vera samkeppnisfært við nágrannalönd um tækjakost, aðbúnað sjúklinga og aðstæður starfsmanna: „Verkefnin framundan eru ærin. Ég legg áherslu á að landsmenn geti notið aðgengis að heilbrigðisþjónustu óháð búsetu og það er afar mikilvægt að efla heilsugæsluna sem fyrsta viðkomustað sjúklinga í heilbrigðiskerfinu.“ 

Kristján Þór er fæddur á Dalvík 15. júlí 1957. Hann var bæjarstjóri Dalvíkur 1986-1994, bæjarstjóri Ísafjarðar 1994-1997 og bæjarstjóri Akureyrar 1998-2006. Hann hefur setið á Alþingi frá árinu 2007. Á Alþingi hefur hann setið í fjárlaganefnd 2007-2013, iðnaðarnefnd 2007-2009, umhverfisnefnd 2009-2011. Árin 2007-2009 sat hann í Íslandsdeild Norðurlandaráðs og í Íslandsdeild þingmannaráðstefnunnar um norðurskautsmál árin 2009-2013.