„Ofbeldi þrífst í aðgreiningu“
Fatlaðar konur í Tabú og Kvennahreyfingu Öryrkjabandalags Íslands afhentu í dag Eygló Harðardóttur, félags- og húsnæðismálaráðherra, kröfuskjal um aðgerðir til að vinna gegn ofbeldi í garð fatlaðs fólks og færðu henni jafnframt skömm í hattinn á táknrænan hátt. Ráðherra afhenti þeim við sama tækifæri upplýsingar um aðgerðir ráðuneytisins til að sporna við ofbeldi.
Sigríður Jónsdóttir las ráðherra kröfugerðina og afhenti hana síðan fyrir hönd hópsins. Rauði þráðurinn í kröfugerðinni lýtur að því að vinna þurfi gegn aðgreiningu í samfélaginu og að ofbeldi þrífist við þær aðstæður. Eygló þakkaði hópnum fyrir þeirra mikilvæga framlag til vitundarvakningar í samfélaginu vegna ofbeldis gegn fötluðu fólki og tók undir áherslur þeirra um að vinna gegn aðgreiningu.