Bætur almannatryggingakerfisins hækka um 9,7%
Bætur þeirra sem fá greiðslur úr almannatryggingakerfinu hækka um 9,7% þann 1. janúar 2016. Hækkun sem þessu nemur tekur til allra bóta lífeyris-, sjúkra- og slysatrygginga og til félagslegrar aðstoðar.
Meðlagsgreiðslur hækka einnig um 9,7% og sama máli gegnir um greiðslur úr Fæðingarorlofssjóði, atvinnuleysisbætur, greiðslur til lifandi líffæragjafa og til foreldra langveikra og alvarlega fatlaðra barna. Tekjuviðmið framfærsluuppbótar og frítekjumarks fólks sem býr á dvalar- og hjúkrunarheimilum hækkar einnig sem þessu nemur.
Tryggingastofnun ríkisins hefur birt á vef sínum töflu með upplýsingum um upphæðir bóta almannatrygginga 1. janúar næstkomandi.