Fréttir
  • Táknmálstúlkuð fræðslumynd fyrir börn gegn kynferðislegu ofbeldi
    Táknmálstúlkuð fræðslumynd fyrir börn gegn kynferðislegu ofbeldi

Táknmálstúlkuð fræðslumynd fyrir börn gegn kynferðislegu ofbeldi

6/12/2016

Velferðarráðuneytið birtir hér með táknmálstúlkaða teiknimynd sem Evrópráðið lét gera á síðasta ári til að fræða börn og stuðla að aukinni samfélagsvitund um kynferðisofbeldi gegn börnum.

Teiknimyndin hefur verið þýdd á fjölmörg tungumál. Hún var frumsýnd hér á landi með íslenskum texta í fyrra, fyrir tilstilli stýrihóps velferðarráðuneytisins, mennta- og menningarmálaráðuneytis og innanríkisráðuneytis um aðgerðir gegn ofbeldi og afleiðingum þess, sem ásamt Barnaverndarstofu og Umboðsmanni barna beindu því til skólastjórnenda að sýna myndina 18. nóvember sem er árlegur Evrópudagur um vernd barna gegn kynferðislegri misnotkun. Markmiðið er að stuðla að aukinni umræðu og samfélagsvitund um kynferðislegt ofbeldi gegn börnum og að kynna samning Evrópuráðsins um vernd barna gegn kynferðislegri misneytingu og kynferðisofbeldi, svonefndan Lanzarote-samning. Samningurinn er heildstæðasta og víðtækasta alþjóðasamþykkt sem gerð hefur verið um vernd barna gegn kynferðisofbeldi. Ísland undirritaði Lanzarote-samninginn árið 2008 og fullgilti hann árið 2012.

Samskiptamiðstöð heyrnarlausra og heyrnarskertra annaðist táknmálstúlkun myndarinnar sem hér birtist og hyggst miðstöðin kynna myndina sérstaklega fyrir heyrnarlausum börnum og foreldrum þeirra. Myndin verður jafnframt aðgengileg á vef Evrópuráðsins, á Signwiki.is og á vef Umboðsmanns barna og Barnaverndarstofu.

 

Til baka Senda grein