Fréttir

Aðstoðarmenn félags- og jafnréttismálaráðherra

12/1/2017

Þorsteinn Víglundsson, félags- og jafnréttismálaráðherra, hefur ráðið sér tvo aðstoðarmenn til starfa í velferðarráðuneytinu, þau Karl Pétur Jónsson og Þorbjörgu Sigríði Gunnlaugsdóttur.

Verkefni félags- og jafnréttismálaráðherra eru á sviði félags- og fjölskyldumála, almannatrygginga, húsnæðismála, vinnumála og jafnréttismála, líkt og nánar er fjallað um í forsetaúrskurði um skiptingu stjórnarmálefna milli ráðuneyta í Stjórnarráði Íslands nr. 1/2017.

Karl Pétur JónssonKarl Pétur Jónsson er fæddur 30. ágúst 1969 í Kópavogi. Hann lauk stúdentsprófi frá Verzlunarskóla Íslands árið 1991, BA prófi í stjórnmálafræði frá HÍ 2003 og MBA gráðu frá HR 2008. Karl Pétur starfaði á markaðsdeild Frjálsrar fjölmiðlunar 1997-1999, stofnandi og ráðgjafi hjá almannatengslafyrirtækinu Inntaki 1999-2006. Karl Pétur starfaði hjá fjárfestingabankanum Askar Capital frá 2007-2009 og hefur frá þeim tíma verið ráðgjafi í almannatengslum ásamt því að framleiða leikverk og sjónvarpsþætti. Karl Pétur er varabæjarfulltúi á Seltjarnarnesi þar sem hann einnig situr í skólanefnd og jafnréttisnefnd. Hann er kvæntur Guðrúnu Tinnu Ólafsdóttur og eiga þau fimm börn á aldrinum 5-19 ára. 

 

Þorbjörg Sigríður GunnlaugsdóttirÞorbjörg Sigríður Gunnlaugsdóttir er fædd 23. maí 1978 í Reykjavík. Hún lauk stúdentsprófi frá MR 1998, lögfræðiprófi frá Háskóla Íslands 2005, LL.M. gráðu frá Columbia University í New York 2011 og er með diplómagráðu í afbrotafræði frá HÍ. Þorbjörg Sigríður hefur verið deildarforseti lagadeildar Háskólans á Bifröst frá 2015. Hún starfaði sem aðstoðarsaksóknari og deildarstjóri ofbeldisbrotadeildar hjá lögreglustjóranum á höfuðborgarsvæðinu, var aðstoðarmaður dómara í Héraðsdómi Reykjavíkur, vann við rannsóknarstörf ásamt Hildi Fjólu Antonsdóttur hjá EDDU – Öndvegissetri við HÍ við rannsókn á einkennum nauðungarmála og málsmeðferð þeirra hjá lögreglu og ákæruvaldi á árunum 2008 og 2009. Hún var aðstoðarsaksóknari hjá ríkissaksóknara áður en hún tók til starfa sem deildarforseti lagadeildar Háskólans á Bifröst. Pistlahöfundur í Fréttablaðinu og einnig í Viðskiptablaðinu. Hefur setið í stjórn UNIFEM, í stjórn Kvennaathvarfsins og ritstjórn 19. júní tímarits Kvenréttindafélags Íslands. 

Til baka Senda grein