Nýr aðstoðarmaður velferðarráðherra
Guðbjartur Hannesson velferðarráðherra hefur ráðið Gunnar Axel Axelsson í starf aðstoðarmanns, í samræmi við 22. gr. laga um Stjórnarráð Íslands nr. 115/2011. Gunnar Axel er viðskiptafræðingur að mennt og situr í bæjarstjórn Hafnarfjarðar.
Gunnar Axel lauk prófi í viðskiptafræðum frá Háskólanum á Bifröst árið 2003. Á árunum 2003-2004 lagði hann stund á nám í alþjóðaviðskiptum við Viðskiptaháskólann í Árósum og stundar nú meistaranám í opinberri stjórnsýslu við Háskóla Íslands. Frá árinu 2005 hefur Gunnar Axel starfað sem sérfræðingur í launa- og kjararannsóknum hjá Hagstofu Íslands.
Gunnar Axel er kvæntur Katrínu Nicolu Sverrisdóttur leikskólakennara og eiga þau fjögur börn.
Meginhlutverk aðstoðarmanna er að vinna að stefnumótun á málefnasviði ráðuneytis undir yfirstjórn ráðherra og í samvinnu við ráðuneytisstjóra.
Frá því að Guðbjartur tók við embætti velferðarráðherra hefur Anna Sigrún Baldursdóttir verið aðstoðarmaður hans og mun hún gegna því starfi áfram ásamt Gunnari Axel.